NAVI MUMBAI NEWS : खारघरमध्ये ओव्हरटेक केल्याच्या रागातून हेल्मेटने मारहाण, 45 वर्षीय व्यक्तीने गमावले प्राण

Navi Mumbai Crime News : राज्यातल्या गुन्हेगारीच्या घटनांमध्ये वाढ झाली आहे. खारघरमध्ये एक धक्कादायक घटना घडल्याचं समोर आलं आहे. खारघरमधील उत्सव चौकात रात्री एका दुचाकीस्वाराला हेल्मेटने मारहाण केल्याची घटना समोर आली आहे. डोक्यावर मार बसल्याने या व्यक्तीला ब्रेन हॅमरेज झाला. त्यानतंर या व्यक्तीचा मृत्यू झाला. शिवकुमार शर्मा (वय -45 वर्षे) असं मृत्यू झालेल्या व्यक्तीचं नाव आहे. या मारहाणीचा व्हिडिओ सोशल मीडियावर व्हायरल झाला आहे. (Navi Mumbai News)

नेमकं प्रकरण काय ?

रविवारी (2 फेब्रुवारी) रात्री खारघर (Kharghar) भागातील बेलपाडा ते उत्सव चौकादरम्यानच्या रस्त्यावर दोन दुचाकीस्वारांमध्ये वाद झाला. ओव्हरटेक करणे, हुलकावणी देणे अशा क्षुल्लक कारणामुळे दोघांमध्ये भांडण सुरु झालं. या भांडणाचं रुपांतर मारहाणीत झालं. ओव्हरटेक करणाऱ्या दोन तरुणांनी शिवकुमारच्या डोक्यात अनेक वेळा हेल्मेटने वार केला. यामुळे शिवकुमार यांच्या डोक्याला दुखापत झाली. तशाच जखमी अवस्थेत ते स्वत: गाडी चालवत खारघर पोलीस स्टेशनमध्ये गेले आणि घडलेला सगळा प्रकार सांगितला. पोलिसांनी त्यांची तक्रार लिहून घेतली. पण तक्रार लिहून घेत असताना शेवटच्या क्षणी शिवकुमार शर्मा बेशुद्ध झाले. पोलिसांनी त्यांना लगेच रुग्णालयात दाखल केलं, मात्र डॉक्टरांनी त्यांचा मृत्यू झाल्याचं जाहीर केलं. (Maharashtra News)

सध्या नवी मुंबई पोलीस (Navi Mumbai Police) हे मारहाण करणाऱ्यांचा शोध घेत आहेत. मारेकरी हे साधारण 22 ते 25 वयोगटातले असल्याची माहिती मिळाली आहे. पोलिसांनी या प्रकरणात दोघांविरुद्ध हत्येचा गुन्हा नोंदवला आहे. या मारेकऱ्यांना पकडण्यासाठी पोलिसांच्या 15 वेगवेगळ्या टीम कार्यरत आहेत. अद्याप आरोपींना पकडण्यात यश आलेलं नाही. ओव्हरटेक केल्याच्या रागात मारहाण झाल्यामुळे एका व्यक्तीने आपले प्राण गमावले आहेत. या घटनेमुळे हळहळ व्यक्त होत आहे. मारहाण करणाऱ्यांना लवकरात लवकर अटक करण्यात यावं, अशी मागणी होत आहे. व्हायरल झालेल्या व्हिडिओमधून आरोपींविषयीची माहिती मिळण्याची शक्यता आहे. तसेच आसपास सीसीटीव्ही असल्यास त्यातील फुटेजचा उपयोगही आरोपींना ओळखण्यासाठी होऊ शकतो. या घटनेत आता आरोपी कधी पकडले जातायत, ते पाहावं लागेल.

2025-02-04T01:24:46Z